حیدرآباد- اسپیکر اسمبلی پوچارام سرینواس ریڈی نے حالیہ اسمبلی حلقہ منوگوڑ کے ضمنی انتخاب میں کامیابی حاصل کرنے والے ٹی آر ایس کے رکن اسمبلی کے پربھاکر ریڈی کی اسمبلی کی رکنیت کا حلف دلایا ۔ اس موقع پر ریاستی وزراء کے ٹی آر ، ہریش راؤ ، وی پرشانت ریڈی ، محمد محمود علی ، جگدیش ریڈی ، اندرا کرن ریڈی ، پی اجئے کمار کے علاوہ ٹی ار ایس کے ارکان پارلیمنٹ ، ارکان اسمبلی ، ارکان قانون ساز کونسل مختلف کارپوریشنس کے صدور نشین اور ٹی آر ایس کے قائدین نے شرکت کی ۔ حلف برداری کے بعد اسپیکر اسمبلی نے نئے رکن اسمبلی کو اسمبلی کے رولس بکس اور شناختی کارڈ حوالے کیا ۔ واضح رہے کہ جاریہ ماہ 3 نومبر کو منعقدہ ضمنی انتخاب میں ٹی آر ایس کے امیدوار کے پربھاکر ریڈی نے بی جے پی کے امیدوار کومٹ ریڈی راج گوپال ریڈی کو 10 ہزار سے زائد ووٹوں کی اکثریت سے شکست دی تھی ۔ حلف لینے کے بعد میڈیا سے بات چیت کرتے ہوئے ٹی آر ایس کے رکن اسمبلی کے پربھاکر ریڈی نے پارٹی امیدوار بنانے اور انتخابی مہم میں حصہ لینے پر چیف منسٹر کے سی آر سے اظہار تشکر کیا اور ساتھ ہی ان کی انتخابی مہم میں حصہ لینے والے تمام وزراء ، ارکان اسمبلی ، ارکان پارلیمنٹ ، ارکان قانون ، ساز کونسل اور پارٹی کے دوسرے قائدین کا بھی شکریہ ادا کیا ۔ انہوں نے کہا کہ انتخابی مہم کے دوران جو بھی وعدے کئے گئے ہیں انہیں پورا کرنے کے لیے وہ ہر ممکن کوشش کریں گے ۔۔