نیوزی لینڈ پارلیمنٹ کے اسپیکر ملارڈ نے اپنے ٹوئٹر پر ایک تصویر شیئر کرتے ہوئے لکھا کہ ’’عموماً اسپیکر کی کرسی پر کوئی پریزائڈنگ افسر بیٹھتا ہے، لیکن آج اس کرسی پر میرے ساتھ ایک وی آئی پی بیٹھا۔‘‘
21 اگست کو نیوزی لینڈ کی پارلیمنٹ میں ایک انتہائی دلچسپ نظارہ اس وقت دیکھنے کو ملا جب اسپیکر ٹریور ملارڈ نے پارلیمنٹ میں اپنی کرسی پر بیٹھ کر ایک نوزائیدہ بچے کو دودھ پلایا۔ یہ نوزائیدہ بچہ کسی اور کا نہیں بلکہ نیوزی لینڈ کے رکن پارلیمنٹ ٹماتی کافے کا تھا جسے اسپیکر اپنی گود میں سلائے ہوئے نظر آئے۔ قابل ذکر یہ بھی ہے کہ ایک طرف تو اسپیکر ٹماتی کے بیٹے کو دودھ پلا رہے تھے اور دوسری طرف ٹماتی خود پارلیمانی بحث میں حصہ لے رہے تھے۔
دلچسپ بات یہ ہے کہ بچے کو دودھ پلاتے ہوئے تصویر اسپیکر ٹریور ملارڈ نے خود اپنے ٹوئٹر ہینڈل پر شیئر بھی کیا ہے۔ انھوں نے تصویر کے ساتھ لکھا ہے کہ ’’عام طور پر اسپیکر کی کرسی پر کوئی پریزائڈنگ افسر ہی بیٹھ سکتا ہے، لیکن آج اس کرسی پر میرے ساتھ ایک وی آئی پی بیٹھا۔‘‘ ان کا اشارہ بچے کی طرف تھا۔ ٹریور ملارڈ نے مزید لکھا کہ ’’میں ٹماتی کافے اور ٹِم کو گھر کے اس رکن کے لیے مبارکباد دیتا ہوں۔‘‘