چھٹے مرحلے کی انتخابی مہم ختم ہوتے ہی ساتویں مرحلے کی انتخابی مہم شروع ہوگئی ہے۔ان دونوں مرحلوں میں اپنی ساکھ بچانے کی کوششوں میں بی جے پی پورے تن من دھن سے مصروف دکھائی دے ہی ہے۔ اس نے اس کیلئے پوری طاقت جھونک رکھی ہے۔وزیراعظم اور وزیرداخلہ اپنی تمام تر سرکاری مصروفیات کو بالائے طاق رکھ کر اترپردیش کے عوام کو رجھانے میں لگے ہیں۔اسی سلسلے کےتحت بدھ کو وزیراعظم مودی نے غازی پور میں ، وزیرداخلہ امیت شاہ نے جونپور میں، وزیر دفا ع راج ناتھ سنگھ نے مرزا پور میں اور وزیراعلیٰ یوگی آدتیہ ناتھ نے اعظم گڑھ میں عوامی ریلیاں کیں اور بی جے پی کی حکومت بچانے اور بنانے کی اپیل کی۔ غازی پور میں ایک عوامی جلسے سے خطاب کرتے ہوئے وزیراعظم مودی نے اپوزیشن کو اپنی تنقید کا نشانہ بنایا۔ انہوں نے کہا کہ یہ ’پریوار وادی‘ لوگ ہیں جو ملک و ریاست کے مفاد پر اپنے او ر اپنے خاندان کے مفاد کو ترجیح دیتے ہیں۔ یہ ملک کو طاقت ور بھی نہیں بننے دینا چاہتے۔ اس موقع پر انہوں نے مفت راشن کو اپنی حکومت کا ایک بڑا کارنامہ بنا کر پیش کرتے ہوئے کہا کہ ہماری حکومت ریاست کے ۱۵؍ کروڑ افراد کو ہر ماہ مفت راشن فراہم کررہی ہے جو دوسری جماعتوں کی نظروں میں بری طرح کھٹک رہی ہے۔ انہوں نے کہا کہ ہماری جماعت تمام لوگوں کا وکاس چاہتی ہے لیکن دوسری جماعتیں ایک مخصوص طبقے کیلئے کام کررہی ہیں۔
جونپور میں ایک ریلی سے خطاب کرتے ہوئے مرکزی وزیر داخلہ امیت شاہ نے اپوزیشن بالخصوص سماج وادی پارٹی کو اپنی تنقید کا نشانہ بنایا۔ انہوں نے کہا کہ اس بار بی جے پی کو عوام سے جو محبت مل رہی ہے، وہ اس بات کا ثبوت ہے کہ ریاست میں ایک بار پھر بی جے پی کی حکومت تشکیل پانے والی ہے۔ انہوں نے کہا کہ اترپردیش میں ۲۰۱۴ء کے بعد ہم نے ۲۰۱۷ء اور ۲۰۱۹ء میں شاندار جیت حاصل کی اور۲۰۲۲ء میں کامیابی کے ساتھ ہی ہم اس جیت کا ’چوکا‘ لگانے والے ہیں۔ انہوں نے کہا کہ اس بار ہم ۳۰۰؍ سے زیادہ سیٹیں جیتیں گے۔پولرائزیشن ہی کو کامیابی کی واحد کلید محسوس کرتے ہوئے امیت شاہ نے کہا کہ ’’ اکھلیش کی ایک آنکھ سے ایک مخصوص ذات دکھائی دیتی ہےجبکہ دوسری آنکھ سے ایک مخصوص مذہب دکھائی دیتا ہے۔‘‘ وزیر دفاع راج ناتھ سنگھ نے ایک انتخابی جلسے سے خطاب کرتے ہوئے دعویٰ کیا کہ یوپی میں بی جے پی ہی حکومت بنائے گی۔ اسی کے ساتھ انہوں نے یہ کہہ کر یوگی کیلئے راحت کا سامان فراہم کردیا کہ یوگی ہی اس حکومت کی قیادت کریںگے۔ انہوں نے کہا کہ نظم ونسق کو درست کرتے ہوئے ریاست کو ترقی کو نئی بلندیوں پر لےجانے والی بی جے پی دوسری بار یوگی کی قیادت میں اترپردیش میں حکومت بنائے گی۔ حیرت انگیز طور پر انہوں نے یوگی کو خود سے بہتر وزیراعلیٰ بھی قرار دیا۔ مرزا پور میں ایک عوامی جلسے سے خطاب کرتے ہوئے راج ناتھ سنگھ نے وزیر اعلیٰ یوگی آدتیہ ناتھ کی جم کر تعریف کی۔ انہوں نے کہا کہ انہیں یہ کہنے میں کوئی تکلف نہیں ہے کہ موجودہ بی جے پی حکومت ان کےمیعاد کار کے مقابلے سے بھی کہیں بہتر ہے۔ انہوں نے کہا کہ ۲۰۱۷ءسے پہلے کی حکومت میں مافیا اور مجرمین اتنا اثر رکھتے تھے کہ ان کے کہنے پر افسران کے تبادلے ہوجایاکرتے تھے جبکہ آج مافیا اور جرائم پیشہ افراد کی جگہ جیل کی چہاردیواری بن کر رہ گئی ہے۔ اس موقع پر انہوں نے کچھ دعوے بھی کئے۔ بقول راج ناتھ سنگھ ’’ریاست کی معیشت نے یوگی حکومت میں لمبی چھلانگ لگانے میں کامیابی حاصل کی ہے۔۵؍ سال قبل ۱۱؍لاکھ کروڑ کی معیشت والا اترپردیش آج۲۱؍لاکھ کروڑ روپوں کی معیشت کا مالک ہے۔‘‘ خیال رہے کہ یوپی الیکشن سے قبل ہی اس طرح کی قیاس آرائیوں کا بازار گرم ہے کہ اگر بی جے پی کامیاب بھی ہوگئی تو شاید یوگی وزیراعلیٰ نہ بن سکیں۔
ساتویں مرحلے کی انتخابی مہم کا آغاز، بی جے پی نے پوری طاقت جھونکی
