محکمہ انکم ٹیکس نے اب یوپی کے ایک اور بڑے عطر کاروباری اور سماج وادی پارٹی کے ایم ایل سی کے یہاں جمعہ کی صبح چھاپے مارے۔قانون ساز کونسل کے رکن پشپ راج جین عرف پمپی جین اورعطر کے تاجر فیضان ملک کے گھر اور تجارتی اداروں پر چھاپے مارے گئے۔ محکمہ انکم ٹیکس کی ٹیموں نے یہ کارروائی صبح سوا ساتبجے شروع کی اور خبر لکھے جانے تک کچھ جگہوں پر کارروائی جاری تھی۔ کانپور کے علاوہ قنوج، ہاتھرس، لکھنؤ، دہلی اور ممبئی میں ۳۵؍ مقامات پر ایک ساتھ چھاپے مارے گئے۔کانپور میں آنند پوری کے رہنے والے پمپی جین کے بہنوئی ڈاکٹر انوپ جین کے گھر اور اداروں پر بھی کارروائی کی گئی ۔ انکم ٹیکس حکام پمپی جین سے قنوج میں ان کے گھر پر بھی پوچھ گچھ کر رہے ہیں۔
سماج وادی پارٹی کے ایم ایل سی پشپ راج جین کے گھر پر آئی ٹی کی ریڈ ایسے وقت میں ہورہی ہے، جب ایس پی صدر اکھلیش یادو خود قنوج میں ہیں۔ پشپ راج جین کے مسئلے پر اکھلیش یادو پریس کانفرنس کرنے والے تھے مگر سرچ آپریشن کے بعد انہوں نے اسے موخر کردیا تھا ۔ دراصل، پیوش جین کے گھر ملے کروڑوں روپوں کے بعد سے ہی پشپ راج جین چرچا میں تھے۔ جب پیوش جین کے ساتھ پشپ راج جین کا نام سامنے آیا تھا تو انہوں نے خود کہا تھا کہ ان کا پیوش جین کے ساتھ کوئی لینا دینا نہیں ہے۔ دونوں کا نام ایک ساتھ اُچھلنے کی وجہ یہ تھی کہ دونوں کا نام تقریباً ایک جیسا ہے ، دونوں کے نام میں جین ہے،دونوں کابزنس بھی ایک جیسا ہے اور دونوں کا گھر ایک ہی گلی میں ہے ۔
دوسری جانب ایس محمد ایوب محمد یعقوب فرم کے مالک فیضان ملک کے گھر، کارخانہ پر بھی چھاپہ مارا گیا۔ فیضان ملک بھی عطر بناتے ہیں۔ ان کا گھر اور فیکٹر ی قنوج کے منڈئی محلہ میں ہے۔ انکم ٹیکس محکمہ نے قنوج میں جہاں ۱۳؍ اداروں پر چھاپہ مارے ہیں وہیں کانپور میں ان کے بہنوئی کی رہائش اور اداروں کے علاوہ پانچ اور اداروں پر چھاپے مارے ہیں۔ پمپی جین کے ایم ایل سی ہونے کی وجہ سے انکم ٹیکس افسران نے اپنے ساتھ پی اے سی کے ۱۰۰؍ جوانوں کو بھی رکھا تھا ۔ کانپور اور قنوج میں چھاپوں میں تقریباً ۱۷۵؍ انکم ٹیکس افسر شامل ہیں۔
اس معاملے میںسماجوادی پارٹی سربراہ اکھلیش یادو نے شدید ردعمل کا اظہار کیا ہے۔انہوں نے کہا کہ نفرت کرنے والوں کو بھائی چارہ کی خوشبو برداشت نہیں ہوتی ہے۔انہوں نے کہا کہ بی جے پی ہر الیکشن سے قبل سرکاری ایجنسیوں کا غلط استعمال کرتی ہے اور ابھی بھی یہ سلسلہ جاری ہے بلکہ ان ایجنسیوں نے بھی بی جے پی سے اتحاد کرلیا ہے۔ اکھلیش کے مطابق سماجوادی عطر بنانے والے کی تلاش میں انہوں نے اپنے ہی ساتھی پیوش جین پر چھاپہ ماری کردی تھی ، جس میں ان کے کئی ساتھی زد میں آگئے ، اب اس کی شرمندگی مٹانے کی کوشش کی جارہی ہے ۔ بی جے پی کی ڈیجیٹل ٹیم اصل جین کی پہچان نہیں کرسکی تھی ۔
یوپی: اب پشپ راج جین اور یعقوب پرفیوم پر انکم ٹیکس کا چھاپہ
