نئی دہلی: آل انڈیا مسلم پرسنل لاءبورڈ کے سکریٹری اور بابری مسجد ایکشن کمیٹی کے کنوینر ایڈوکیٹ ظفر یاب جیلانی نے ملت ٹائمز سے بات کرتے ہوئے کہاکہ سنی وقف بورڈ کے انکار سے ریو یو پٹیشن کی عرضی پر کوئی فرق نہیں پڑنے والاہے ۔
آٹھ فریقو میں سے ایک فریق وہ ہے ۔ انہیں ذرہ برابر بھی دیگر فریقوں کے مقابلے میں اہمیت اور ترجیح حاصل نہیں ہے اس لئے انہوں نے جو فیصلہ کیا کہ سنی وقف بورڈ ریو یو پٹیشن کی عرضی دائر نہیں کرے گا اس سے کوئی فرق نہیں پڑنے والاہے ۔
ایڈوکیٹ ظفر یاب جیلانی نے کہاکہ 17نومبر کو آل انڈیا مسلم پڑسنل لاءبورڈ نے فیصلہ کیاتھا کہ ریویو پٹیشن کی عرضی دائر کی جائے گی جس پر ہم قائم ہیں اور ہندوستان کے تقریبا سبھی مسلمان اس فیصلے میں ہمارے ساتھ ہیں ،سبھی چھوٹی بڑی مسلم تنظیموں نے بورڈ کے فیصلے کا خیر مقدم کیا ہے ،اس لئے جو دوسرے فریق ہیں ان کے ذریعہ ہم ریو یو پٹیشن کی عرضی دائرکریں گے ۔ ایک سوال کے جواب میں انہوں نے کہاکہ دسمبر کے پہلے ہفتہ میں بابری مسجد ۔ رام مندر کے تعلق سے سپریم کورٹ کے فیصلے کے خلاف نظر ثانی کی عرضی دائر کریں گے ۔
واضح رہے کہ یوپی سنی سنٹرل بورڈ نے منگل کے روز بورڈ اراکین کے ساتھ ہوئی میٹنگ کے بعد فیصلہ کیا ہے کہ وہ بابری مسجد۔ رام مندر معاملے میں سپریم کورٹ کے فیصلے پر نظر ثانی کی اپیل داخل نہیں کرے گا۔
عدالت عظمی نے 9 نومبر کو بابری مسجد۔رام مندر متنازع اراضی ملکیت معاملے میں فیصلے سناتے ہوئے متنازع زمین پر رام مندر کی تعمیر کے لئے ٹرسٹ بنانے اور مسجد کے لئے ایودھیا میں ہی کسی نمایاں مقام پر 5 ایکڑ زمین فراہم کرنے کا فیصلہ سنایا تھا۔
