نئی دہلی :دہلی کے سابق نائب وزیر اعلیٰ منیش سسودیا کو راحت نہیں ملی ہے۔شراب پالیسی معاملے میں سی بی آئی ریمانڈ پر راؤز ایونیو کورٹ نے سسودیا کی سی بی آئی ریمانڈ میں6 مارچ تک توسیع کردی ہے۔ اس کے علاوہ سسوڈیا کی ضمانت عرضی پر سماعت 10 مارچ کو ہوگی۔سی بی آئی نے عدالت میں کہا کہ منیش سسودیا جانچ میں تعاون نہیں کر رہے ہیں، اس لیے تین دن کی مزید ریمانڈ دی جائے۔ سی بی آئی نے عدالت کو بتایا کہ سسودیا سے پوچھ تاچھ کی ریکارڈنگ سی ڈی میں ہے۔ پوچھ تاچھ کے لیے ابھی ملزمین کا آمنا سامنا نہیں ہوا ہے۔ اس درمیان سسودیا نے عدالت میں کہا کہ انہیں تقریباً 10 گھنٹوں تک پوچھ تاچھ کے لیے بٹھا رہے ہیں اور بار بار وہی سوال پوچھ رہے ہیں۔ یہ ذہنی اذیت سے کم نہیں ہے۔‘‘عآپ رکن اسمبلی سوربھ بھاردواج نے اس معاملے میں کہا کہ سی بی آئی کو ثبوت اور سچائی سے کوئی لینا دینا نہیں ہے۔ وہ صرف وہی سن رہے ہیں جو مرکزی حکومت کہہ رہی ہے۔ یہ پورا عمل منیش سسودیا کو پریشان کرنے کے لیے ہے۔واضح رہے کہ منیش سسودیا کو دہلی حکومت کی شراب پالیسی میں مبینہ اسکام کے معاملے میں سی بی آئی نے اتوار کے روز گرفتار کیا تھا۔ سی بی آئی نے انھیں پیر کو راؤز ایونیو کورٹ میں پیش کیا تھا۔ عدالت نے سسوڈیا کو 5 دن کی سی بی آئی حراست میں بھیج دیا تھا۔دراصل کیجریوال حکومت نے 17 نومبر 2021 کو دہلی میں نئی ایکسائز پالیسی نافذ کی تھی۔ دہلی حکومت نے نئی ایکسائز (آبکاری) پالیسی لانے کو لے کر مافیا راج ختم کرنے کی دلیل پیش کی تھی۔ جولائی 2022 میں دہلی کے سابق چیف سکریٹری نے اس معاملے میں لیفٹیننٹ گورنر وی کے سکسینہ کو رپورٹ سونپی تھی۔ رپورٹ میں آبکاری پالیسی میں گڑبڑی کے ساتھ ہی نائب وزیر اعلیٰ منیش سسودیا پر شراب کاروباریوں کو نامناسب فائدہ پہنچانے کا بھی الزام لگایا گیا تھا۔ اسی رپورٹ کی بنیاد پر سی بی آئی نے 17 اگست 2022 کو معاملہ درج کیا تھا۔
منیش سیسوڈیا کی سی بی آئی ریمانڈ میں 6 مارچ تک توسیع
