بی ایس پی کسی گٹھ بندھن میں شامل نہیں ہوگی: مایاوتی

بی ایس پی سربراہ مایاوتی نے اتوار کو واضح کیا کہ وہ اپوزیشن اتحاد کی کسی بھی کوشش میں حصہ نہیں لیں گی۔ انہوں نے یہ بھی اعلان کیا کہ 2023 میں ہونے والے کچھ ریاستی انتخابات میں بی ایس پی تنہا مقابلہ کرے گی اور کسی اتحاد میں شامل نہیں ہوگی۔
آج مایاوتی کا یوم پیدائش ہے جسے عوامی بہبود کے دن کے طور پر منایا جا رہا ہے۔ اس موقع پر مایاوتی کو مبارکباد دینے کے لیے پارٹی کارکنان جمع تھے۔ مایاوتی نے میڈیا سے بات چیت بھی کی۔حکمراں بی جے پی پر اپنا حملہ جاری رکھتے ہوئے، بی ایس پی سربراہ نے کارکنوں کو 2024 کے لوک سبھا انتخابات کی تیاری شروع کرنے کی تلقین کی۔ مایاوتی آج 67 سال کی ہو گئیں۔ بی ایس پی نے حالیہ انتخابات میں مایوس کن کارکردگی کا مظاہرہ کیا ہے۔ 2019 کے لوک سبھا انتخابات بی ایس پی نے ایس پی کے ساتھ اتحاد میں لڑے تھے۔ اب جب کہ ان کی سابق حلیف سماج وادی پارٹی کے اکھلیش یادو سمیت کئی اپوزیشن لیڈر اگلے قومی انتخابات سے قبل بی جے پی کے خلاف متحد ہونے کی کوشش کر رہے ہیں، مایاوتی نے حکمراں پارٹی کی تنقید کے باوجود اپوزیشن اتحاد سے اپنی دوری برقرار رکھی ہے۔
اتوار کو میڈیا سے بات کرتے ہوئے مایاوتی نے کہا کہ بی ایس پی آئندہ ریاستی انتخابات یا 2024 میں ہونے والے قومی انتخابات کے لیے کسی پارٹی کے ساتھ اتحاد نہیں کرے گی۔ آنے والے مہینوں میں نو ریاستوں میں اسمبلی انتخابات ہونے والے ہیں۔ انہوں نے زور دے کر کہا، بی ایس پی راجستھان، چھتیس گڑھ اور کرناٹک اسمبلی انتخابات کے ساتھ ساتھ 2024 کے لوک سبھا انتخابات میں کسی بھی پارٹی کے ساتھ اتحاد نہیں کرے گی۔
اتراکھنڈ میں جوشی مٹھ شہر کے ڈوبنے کے تناظر میں، انہوں نے کہا- بی جے پی حکومت کی غلط پالیسیوں کی وجہ سے لوگ قدرتی آفت کا سامنا کر رہے ہیں، ایک سوال پر، مایاوتی نے کہا- مرکزی تفتیشی ایجنسیوں کو سیاست زدہ کر دیا گیا ہے۔