کانگریس نے 26 جنوری سے 25 مارچ تک چلنے والی ’ہاتھ سے ہاتھ جوڑو‘ مہم کی تفصیل آج ایک پریس کانفرنس کے دوران پیش کی۔ اس دوران بتایا گیا کہ ’ہاتھ سے ہاتھ جوڑو‘ مہم کا پبلک ڈائیلاگ پروگرام ’بھارت جوڑو یاترا‘ کی کامیابی کی وسیع شکل ہوگی۔ پریس کانفرنس سے خطاب کرتے ہوئے مہم کے کانگریس انچارج ڈاکٹر مدن موہن جھا نے بتایا کہ ’’ہاتھ سے ہاتھ جوڑو مہم بلاک سطح پر افتتاحی میٹنگ کے ساتھ شروع کیا جائے گا۔ دو ماہ کے پروگرام میں کانگریس کارکنان بوتھ سطح تک دہلی کے باشندوں سے رابطہ کریں گے اور ڈور ٹو ڈور رابطہ کے ذریعہ بھارت جوڑو یاترا کے اصل پیغام کو دہلی باشندوں تک پہنچائیں گے۔‘‘
ڈاکٹر مدن موہن جھا نے بتایا کہ ہاتھ سے ہاتھ جوڑو مہم تین سطح پر چلائی جائے گی۔ (1) بلاک سطح، (2) ضلع سطح، اور (3) ریاستی سطح۔ ریاستی سطح پر ایک عظیم الشان تقریب کا اہتمام کیا جائے گا جس میں کانگریس کی اعلیٰ قیادت بھی خطاب کرے گی۔ ہاتھ سے ہاتھ جوڑو مہم میں علاقہ وار ریاست کے سبھی سابق اراکین پارلیمنٹ، ضلع صدور، کانگریس کمیٹی و دہلی ریاستی کانگریس کے عہدیداران، بلاک صدور، ضلع کوآرڈنیٹرس، سابق اراکین اسمبلی، میونسپل کونسلر، سابق میونسپل کونسلر سمیت ہر بوتھ کے کارکنان ترجیحی بنیاد پر حصہ لیں گے۔
26 جنوری سے شروع ہوگی کانگریس کی ’ہاتھ سے ہاتھ جوڑو‘ مہم،، پیش کیا خاکہ
