وزیر اعظم نریندر مودی کی ہیوسٹن میں ’ہاؤ ڈی موڈی‘ تقریب کافی سرخیوں میں ہے۔ اس تقریب میں وزیر اعظم نے امریکی صدر ڈونالڈ ٹرمپ کی حمایت میں ’اب کی بار ٹرمپ سرکار‘ کے جو نعرے لگوائے تھے اس پر وزیر خارجہ ایس جے شنکر نے صفائی دی ہے۔ ان کی صفائی پر کانگریس کے سابق صدر راہل گاندھی نے ٹوئٹ کر کے طنز کیا ہے ’’وزیر اعظم کو کچھ سفارتکاری سکھائیں‘‘۔
امریکی دورہ پر گئے وزیر خارجہ نے ’ہاوڈی مودی‘ تقریب میں لگوائے گئے نعروں پر صفائی دیتے ہوئے کہا ہے کہ ہندوستان نے امریکی سیاست میں غیر جانبدارانہ حصہ داری نبھائی ہے اور وزیر اعظم نے’اب کی بار ٹرمپ سرکار‘ کہہ کر ڈونالڈ ٹرمپ کے لئے کوئی تشہیر کا کام نہیں کیا بلکہ سال 2014 کے انتخابات میں ٹرمپ کے نعرہ کو ہی دہرایا ہے۔
راہل گاندھی نے اپنے ٹوئٹ میں لکھا ہے ’’شکریہ جے شنکر جی، آپ نے وزیر اعظم کی نا اہلی کو چھپا لیا ان کے اس طرح کے انڈور سمینٹ سے ہندوستان کے لئے ڈیموکریٹس سنگین مسائل پیدا کر سکتے ہیں۔ مجھے امید ہے کہ آپ کے بیان سے یہ چیزیں اب نہیں ہوں گی۔ اب آپ اس پر کام کرتے ہیں تو انہیں بھی تھوڑی سی سفارتکاری سکھا دیجیے۔‘‘
جے شنکر امریکہ کے تین دن کے دورے پر ہیں اور جب اس دورے کے دوران ان سے پوچھا گیا کہ کیا وزیر اعظم نے ’ہاؤڈی مودی‘ تقریب کے ذریعہ ٹرمپ کی تشہیر کی ہے؟ اس سوال کے جواب میں جے شنکر نے کہا ’’نہیں‘‘ وزیر اعظم نے ایسا کچھ نہیں کیا۔ جے شنکر نے کہا کہ وزیر اعظم مودی نے ہیوسٹن میں جو کہا اسے سمجھنے کی ضرورت ہے۔
انہوں نے کہا ’’میری سمجھ میں وزیر اعظم پچھلے انتخابات کی بات کر رہے تھے کیونکہ سال 2014 میں صدارتی چناؤ کی تشہیر کرتے ہوئے خود ٹرمپ نے کہا تھا ’اب کی بار ٹرمپ سرکار‘۔‘‘ جے شنکر نے کہا کہ ہمیں وزیر اعظم کے بیانوں کا غلط مطلب نہیں نکالنا چاہیے اور ایسا کر کے ہم کسی کا فائدہ نہیں کر رہے۔ انہوں نے کہا ’’امریکہ کے ساتھ ہندوستان کا نظریہ غیر جانبدارانہ ہے۔ ہمیں سمجھنا چاہیے کہ امریکہ میں جو بھی ہو رہا ہے یہ ان کی سیاست کا حصہ ہے نہ کے ہندوستان کا۔‘‘
واضح رہے وزیر اعظم مودی نے ہیوسٹن میں امریکی صدر ڈونالڈ ٹرمپ کی حوصلہ افزائی کی تھی، لوک سبھا انتخابات کے دوران اپنے پسندیدہ نعرے ’اب کی بار مودی سرکار‘ کی طرح کہا تھا کہ ’اب کی بار ٹرمپ سرکار‘۔
