حکومت کے خلاف آواز اٹھانے والے کی آواز بند کر دی جائے گی: کانگریس

صحافیوں سے خطاب کرتے ہوئے سرجے والا نے کہا کہ چدمبرم کی گرفتاری جمہوریت کا دن دہاڑے قتل ہے۔ انہوں نے پورے معاملہ پر روشنی ڈالتے ہوئے کہا کہ یہ معاملہ 12 سال پرانا ہے اور اس میں جس کمپنی کو فائدہ پہنچانے کا الزام ہے اس کمپنی کے خلاف کوئی کیس نہیں ہے، جن چھ افسران نے جن میں آر بی آئی کے سابق گورنر بھی شامل ہیں، ان میں سے کسی افسر کے خلاف کوئی معاملہ درج نہیں اور گرفتاری چدمبرم کی ہو رہی ہے جن کا نام کسی بھی ایف آئی آر میں نہیں ہے۔ سرجے والا نے کہا اس کیس میں گزشتہ پانچ سال میں کوئی چارج شیٹ داخل نہیں ہوئی ہے، جو اس بات کا ثبوت ہے کہ اس کیس میں کچھ نہیں ہے۔ چدمبرم کو ایسی خاتون کے بیان پر اس کیس میں پھنسانے کی کوشش ہو رہی ہے جو اپنی بیٹی کے قتل معاملہ میں جیل میں سزا کاٹ رہی ہے۔ یہ ملزم خاتون وعدہ معاف گواہ بھی بن گئی ہے، اب یہ دیکھنے کی ضرورت ہے کہ اس خاتون کو اس بیان کا کیا فائدہ ہوتا ہے۔