امیتابھ بچن سائبر سیکورٹی انڈیا مہم میں شامل

نئی دہلی: مرکزی وزیر داخلہ امیت شاہ نے چہارشنبہ کے روز کہا کہ معروف سنیما فنکار امیتابھ بچن بھی حکومت کی سائبر سیف انڈیا مہم کو مضبوط بنانے کے لیے اس مہم میں شامل ہو گئے ہیں۔ وزیرداخلہ نے سوشل میڈیا پلیٹ فارم ایکس پر ایک پوسٹ میں سائبر سیکورٹی سے متعلق امیتابھ بچن کا ایک ویڈیو شیئر کرتے ہوئے یہ اطلاع دی۔ انہوں نے کہا کہ وزارت داخلہ ملک میں محفوظ سائبر اسپیس بنانے کے لیے پرعزم ہے ۔ انہوں نے کہا کہ انڈین سائبر کرائم کوآرڈینیشن سنٹر I4سی نے اس سمت میں کئی قدم اٹھائے ہیں۔ انہوں نے سائبر سے محفوظ ہندوستان کی تعمیر کے مشن کو تیز کرنے میں ان کے فعال تعاون کے لئے بالی ووڈ لجنڈ کا شکریہ ادا کیا۔ ملینیم اسٹار نے اپنے ایک ویڈیو پیغام میں کہا ہے کہ ملک اور دنیا میں بڑھتا سائبر کرائم تشویشناک ہے ۔ وزارت داخلہ کا انڈین سائبر کرائم کوآرڈینیشن سنٹر اس پر قابو پانے کے لیے کام کر رہا ہے ۔ انہوں نے کہا کہ وہ حکومت کی اپیل پر اس مہم میں شامل ہوئے ہیں ۔ انہوں نے کہا کہ سب مل کر ملک کو اس مشکل سے نجات دلائیں۔ تھوڑی سی حکمت اور احتیاط ہمیں سائبر مجرموں سے بچا سکتی ہے ۔