وسطی کینیا میں پرائمری بورڈنگ اسکول میں آگ لگنے سے سترہ طلبہ ہلاک اور تیرہ شدید زخمی ہو گئے۔ کینیا سے موصولہ خبروں کے مطابق اسکول میں آگ لگنے سے سترہ طالب علم ہلاک ہوگئے جبکہ تیرہ زخمی ہوئے جو مقامی اسپتال میں زیرِ علاج ہیں جن میں سے ایک زخموں کی تاب نہ لاتے ہوئے چل بسا۔
پولیس ترجمان کا کہنا ہے کہ گزشتہ شب نیری کاؤنٹی میں ہل سائیڈ اینڈ اراشا اکیڈمی اسکول میں آتشزدگی کا واقعہ پیش آیا۔ پولیس ترجمان نے بتایا ہے کہ شدید جھلسنے کی وجہ سے بیشتر طلبہ کی شناخت کرنے میں مشکلات پیش آ رہی ہیں۔
دریں اثناء کینیا کے صدر ولیم روٹو نے اس واقعے پر افسوس کا اظہار کرتے ہوئے معاملے کی مکمل تحقیقات کا حکم دے دیا ہے۔
واضح رہے کہ گزشتہ چند برسوں کے دوران کینیا کے اسکولوں میں آتشزدگی کے واقعات عام ہو گئے ہیں۔ ستمبر دوہزار سترہ میں کینیا کے دارالحکومت نیروبی کے ایک اسکول میں آگ لگنے سے دو طالب علم ہلاک ہو گئے تھے۔
