دہلی کے ایک جیولری شوروم میں کروڑوں کی چوری کا معاملہ سامنے آیا ہے۔ یہ معاملہ شہر کےبھوگل علاقہ میں واقع امراؤ سنگھ جیولرس میں پیش آیا جہاں گزشتہ شب چوروں نے زیورات کے پورے شوروم کی صفائی کر دی۔ اس دوران امرائو جیولرس کےکم از کم ۲۵؍ کروڑ روپے کے زیورات چوری ہو گئے۔بتایا جا رہا ہے کہ چور دیوار توڑ کر شوروم میں موجود لاکر تک پہنچ گئےتھے۔ چوری کی اس واردات کو انجام دینے کے لئے چور شوروم کی چوتھی منزل سے چھت کا تالہ توڑ کر نیچے آئے۔ اس کے بعد اسٹرانگ روم کی دیوار میں سوراخ کر کے سی سی ٹی وی کے کنکشن کاٹ د ئیے گئے۔
واضح رہے کہ اتوار کی شام شوروم کے مالک نے شوروم بند کر دیا تھا۔ اگلے دن یعنی پیر کو شوروم بند رہتا ہے۔ منگل کی صبح جب شوروم کھلا تو چوری کا واقعہ سامنے آیا جس کے بعد پولیس کو اطلاع دی گئی۔ اس معاملے کی اطلاع ملتے ہی تھانہ نظام الدین کی پولیس موقع پر پہنچ گئی۔ پولیس نے جو ماجرہ دیکھا اس سے اس کے بھی ہو ش اڑگئے کیوں کہ چوروں نے کوئی واضح سراغ چھوڑے بغیر پوری منصوبہ بندی کے ساتھ چوری انجام دی ہے۔ یاد رہے کہ اتوار کو بالکل اسی طرح کا واقعہ ہریانہ کے امبالہ شہر میں پیش آیا ہے جہاں چوروں نے گیس کٹر کی مدد سے کو آپریٹیو بینک کی دیوار کاٹی ، اسٹرانگ روم میں رکھی تجوری کاٹی اور پھر وہاں رکھے زیورات اور کیش لے اڑے۔ دہلی پولیس کو شبہ ہے کہ امرائوسنگھ جویلرس کی واردات میں بھی انہی چوروں کا ہاتھ ہے یا یہ دونوں معاملے کہیں نہ کہیں سے جڑے ہوئے ہیں۔
دہلی میں سنسنی خیز واردات ،۲۵؍ کروڑ روپے کے زیورات چوری
