آنکھیں پتھرا گئیں حیرت سے تماشائی کی
دیکھ کر مست ادائیں تری انگڑائی کی
مرضِ ہجر کے ماروں کا تھا جینا مشکل
زہر تم نے جو پلایا تو مسیحائی کی
دوریِ وصل میں کیا حال ہوا ہے اس کا
خیریت پوچھ لو آکر کبھی شیدائی کی
ہر قدم خارِ مُغیلاں نے رکھا آنکھوں پر
قدرصحرا میں نہیں کم ترے سودائی کی
لوگ دینے لگے ہر سَمت حوالے میر ے
معتبر ہوگئی شہرت مری رسوائی کی
جب سے توڑا ہے تری یاد نے رشتہ مجھ سے
بڑھ گئی اور بھی ظلمت شبِ تنہائی کی
ہے کسی جانِ بہاراں کی جو آمد آمد
آج کچھ اور ہے رونق مری انگنائی کی
جذبٔہ عشق میں تاثیر کہاں ہے صفؔوی
کچھ بھی وحشت نہ ہوئی کم مرے صحرائی کی
ڈاکٹر محمد صفوان صفوی
صدر شعبہ اُردو ۔سمستی پور کالج ۔سمستی پور
Dr Md Safwan Safwi
Head Department of Urdu
Samastipur College, Samastipur
BIHAR
safwansafwi@gmail.com
