تریپو رہ میں کانگریس۔سی پی ایم ایک ساتھ ،بی جے پی کو چیلنج

تریپورہ میں کانگریس اور سی پی ایم ایک ساتھ الیکشن لڑیں گے۔ سی پی ایم کے جنرل سکریٹری سیتارام یچوری اور کانگریس کے راجیہ سبھا ایم پی مکل واسنک بدھ کو تریپورہ میں تھے، جہاں یچوری نے مل کر الیکشن لڑنے کا اعلان کیا۔ تریپورہ میں مارچ میں اسمبلی انتخابات ہونے والے ہیں اور یہ شمال مشرقی ریاست کانگریس اور بائیں بازو کے ساتھ ساتھ بی جے پی کے لیے بھی اہم ہے۔
سیتارام یچوری نے کہا کہ ہماری توجہ تمام سیکولر طاقتوں کو متحد کرکے بی جے پی کی شکست کو یقینی بنانا ہے تاکہ تریپورہ اور آئین کو بچایا جاسکے۔
دوسری طرف، بی جے پی نے ابھی تک ریاستی حکومت میں اتحادی، انڈیجینس پیپلز فرنٹ آف تریپورہ (آئی پی ایف ٹی) کے ساتھ اتحاد کے حوالے سے اپنے کارڈز ظاہر نہیں کیے ہیں۔ تاہم، بی جے پی لیڈروں نے اشارہ دیا ہے کہ وہ آئی پی ایف ٹی کے ساتھ اتحاد میں ہی الیکشن لڑیں گے۔
2018 میں بی جے پی اور آئی پی ایف ٹی نے مل کر اسمبلی انتخابات لڑے تھے۔ اتحاد نے 60 سیٹوں والی تریپورہ اسمبلی میں 44 سیٹیں جیتیں۔ اس میں بی جے پی کو 36 اور آئی پی ایف ٹی کو 8 سیٹیں ملی ہیں۔ سی پی ایم نے 16 سیٹیں جیتی تھیں۔
کانگریس، جو کبھی تریپورہ میں بڑی طاقت تھی، 2018 میں ایک بھی سیٹ جیتنے میں ناکام رہی اور اسے صرف 2 فیصد ووٹ ملے۔ حالانکہ کانگریس نے گزشتہ سال جون میں اسمبلی ضمنی انتخابات میں ایک سیٹ جیتی تھی۔لیکن اس بار تریپورہ پردیش کانگریس کمیٹی کے لیڈروں کو اے آئی سی سی نے بوتھ لیول تک کام کرنے کو کہا ہے۔