نئی دہلی : “دی ایلومنائی ایسوسی ایشن آف جامعہ ہمدرد” (TAAJH) ریاض الخرج باب کے سابق طلباء کا 10-واں اجلاس 11 نومبر 2022 کو مملکت سعودی عرب کے دارالحکومت ریاض میں منعقد ہوا۔ سابق طلباء کے زیرِ اہتمام منعقد اس اجلاس کا بنیادی مقصد جامعہ ہمدرد کے بانی جناب حکیم عبدالحمید (مرحوم) کی خدمات کو منظرِ عام پر لانا تھا۔ تعلیم کے میدان میں KSA کے بیشتر سابق طلباء اس میٹنگ میں شریک ہوئے۔ جامعہ ہمدرد، نئی دہلی کے وائس چانسلر پروفیسر ایم افشار عالم نے بھی ڈیجیٹل موڈ کے ذریعے شرکت کی۔ سابق طلباء کا اجلاس جناب مشرف علی کی سرپرستی اور پروفیسر ناصر علی صدیقی کی صدارت میں منعقد ہوا۔ KSA میں “دی ایلومنائی ایسوسی ایشن آف جامعہ ہمدرد” (TAAJH) کے معزز صدر پروفیسر ناصر علی صدیقی نے جناب حکیم عبدالحمید (مرحوم) کی تعلیمی میدان اور جامعہ ہمدرد کے قیام میں نمایاں خدمات پر روشنی ڈالی۔ اس دوران انہوں نے ہندوستان بھر میں غریب طلباء کی مالی مدد میں ریڈز کے کردار پر بھی روشنی ڈالی۔ اجلاس کے دوران کئی انڈور اور آؤٹ ڈور گیمز کا بھی انعقاد کیا گیا۔ فاتح اور دوسرا مقام حاصل کرنے والی ٹیموں کو ٹرافیاں دی گئیں۔ اس بار TAAJH نے مختلف شعبوں جیسے کہ انفارمیشن ٹیکنالوجی، مینجمنٹ، فارماسیوٹیکل انڈسٹریز، ماہرین تعلیم، اور تحقیق میں اپنے “Excelence Achievers” کو اعزازات اور اسناد سے نوازا۔ ایکسیلنس ایوارڈ حاصل کرنے والوں میں پروفیسر فیاض شکیل، پروفیسر خالد آر حکیم، ڈاکٹر فیضان رحمٰن، ڈاکٹر شیخ شفیق، ڈاکٹر شاداب محمد، ڈاکٹر ماجد اے گنائی شامل ہیں۔
اس کے علاوہ اس اجلاس میں جامعہ ہمدرد کے سابق طلباء جو اسٹینفورڈ/ایلسیویئر کی 2 فیصد ورلڈ سائنٹسٹ لسٹ میں شامل تھے، کو بھی اعزازات اور اسناد سے نوازا گیا۔ اس تقریب میں ریاض کے بعض نامور مہمانوں نے بھی شرکت کی، جن میں جامعہ ملیہ اسلامیہ ایلومنائی ایسوسی ایشن کے
صدر انیس الرحمٰن، ریاض سے AMOUBA کے سابق صدر سید محمد مطیّب، ریاض ہی سے IFE کے صدر
ڈاکٹر دلشاد احمد اور جناب سلمان خالد کے نام شامل ہیں۔ مجموعی طور پر TAAJH کا یہ اجلاس ایک نہایت کامیاب اجلاس رہا۔ آخر میں ڈاکٹر رئیس الدین نے تقریب میں شرکت کرنے والے تمام مہمانوں اور حاضرین کا بہترین کلمات کے ساتھ شکریہ ادا کیا اور ایک شاندار دعوتِ طعام کے ساتھ یہ تقریب اختتام پذیر ہوئی۔
