کولکاتا : مغربی بنگال کی چیف منسٹر ممتا بنرجی نے آج بی جے پی پر شدید تنقید کرتے ہوئے کہا کہ گجرات اسمبلی انتخابات کے پیش نظر شہریت ترمیمی قانون (سی اے اے ) اور نیشنل رجسٹر آف سٹیزن (این آر سی) کا بی جے پی استعمال کررہی ہے ۔اس کے ساتھ ہی انہو ں نے کہا کہ بنگال میں کسی بھی صورت میں شہریت ترمیمی ایکٹ کے نفاذ کی اجازت نہیں دی جائے گی۔ممتا بنرجی نے کہا کہ بی جے پی ریاست کو تقسیم کرنے کی کوشش کررہی ہے اور علاحدگی پسندی کو ہوا دے رہی ہے ۔ ممتا بنرجی نے اس بات کا اعادہ کیا کہ وہ کبھی بھی ریاست کی تقسیم کی اجازت نہیں دیں گی۔ ممتا بنرجی نے کہاکہ جب بھی الیکشن قریب آتا ہے ، بی جے پی سی اے اے اور این آر سی کو نافذ کرنے کی بات کرنے لگتی ہے ۔ چوں کہ اس سال کے اواخر گجرات میں اسمبلی انتخابات ہونے والے ہیں اور ڈیڑھ سال بعد لوک سبھا انتخابات بھی ہوں گے، اس لئے ایک بار پھر شہریت ترمیمی ایکٹ (CAA) کے نفاذ کا مسئلہ اٹھایا جارہا ہے ۔کرشنا نگر میں جلسے سے خطاب کرتے ہوئے کہا کہ ممتا بنرجی نے کہا کہ بی جے پی ’’فیصلہ‘‘ کرے گی کہ کون شہری ہے اور کون نہیں؟ متوا سماج کے تمام افراد اس ملک کے شہری ہیں۔بنگلہ دیش سے آنے والی کمیونٹی شمالی 24پرگنہ اور ندیا ضلع میں پھیلے ہوئے ہیں۔ انہوں نے کہاکہ بی جے پی ریاست کے شمالی حصوں میں راج بنشیوں اور گورکھوں کو بھڑکاکر کر مغربی بنگال میں علاحدگی پسندی کو ہوا دے رہی ہے ۔ ہم کبھی بھی مغربی بنگال کی تقسیم کی اجازت نہیں دیں گے ۔ممتا بنرجی نے کہا کہ بی جے پی 2024 کے لوک سبھا انتخابات کے بعد اقتدار میں واپس نہیں آئے گی۔ انھوں نے کہا کہ 2019 میں ملک کی سیاسی صورتحال مختلف تھی اور اب تبدیل ہوچکی ہے ۔ 2019میں بی جے پی بہار، جھارکھنڈ اور دیگر کئی ریاستوں میں برسراقتدار تھی، لیکن اب اس کی سیاسی موجودگی پورے ملک میں کم ہوگئی ہے ۔ اب وہ کئی ریاستوں میں اقتدار میں نہیں ہے ۔ ترنمول کانگریس لیڈر نے کہا کہ بی جے پی پہلے ہی کئی ریاستوں میں کمتر مقام پر پہنچ چکی ہے ۔ یہی وجہ ہے کہ وہ اپوزیشن پارٹیوں پر حملے کر رہی ہے اور اپوزیشن لیڈروں کو بدنام کر کے گرفتار کر رہی ہے ۔ ممتا بنرجی نے کہاکہ بنگال میں متواسماج کو تمام حقوق حاصل ہیں، انہیں جائیداد کا حق، لکشمی بھنڈار کی اسکیم کے فوائد بھی مل رہے ہیں۔ انہوں نے مزید کہا کہ صرف جھوٹ پھیلایا جارہا ہے کہ متوا سماج ہندوستانی شہری نہیں ہیں بلکہ سی اے اے کے ذریعہ انہیں شہریت دی جائے گی۔
ممتا بنرجی نے کہا کہ متوا، راج بنشی، دیگر رفیوجی اور ہم سب شہری ہیں۔ اگر آپ شہری نہیں ہیں تو میں بھی نہیں ہوں۔ مودی آپ کے ووٹ سے وزیر اعظم بنے ۔اگر آپ کو ووٹ کا حق نہیں ہے تو وہ کیسے جیتے ؟۔ممتا بنرجی نے کہا کہ میں متوا سماج سے کہہ رہی ہو ں کہ ہم آپ کی شہریت نہیں چھیننے دیں گے ۔ میں اپنی جان دے دوں گی۔ آپ شہری ہیں۔ میں تمہیں کسی جگہ سے بے دخل نہیں ہونے دوں گی۔ میں گھر کو تباہ نہیں ہونے دوں گی۔ یہ ہمارا وعدہ ہے ۔ممتا بنرجی نے کہا کہ ہم نے ایمس کو زمین دی ہے ۔ کالج، یونیورسٹی، ململ تیرتھ ہم نے کیا ہے ۔ بی جے پی صرف بڑی بڑی باتیں کرتی ہیں،سی پی آئی ایم اور کانگریس کے ان کے نقش قدم پر چلتے ہیں۔ممتا بنرجی نے کہاکہ میں تمام لوگوں اور تمام مذاہب کا احترام کرتی ہوں۔
بنگال میں CAAکسی صورت نافذ نہیں ہوگا :ممتا بنرجی
