لکھنؤ: یوپی اسمبلی انتخابات کے تحت 12 اضلاع کی 61 سیٹوں پر پانچویں مرحلہ کی ووٹنگ جاری ہے۔ دریں اثنا، کانگریس کی قومی جنرل سکریٹری اور پارٹی کی یوپی انچارج پرینکا گانددھی نے عوام کو دانشمندی سے اپنے ووٹ کا استعمال کرنے اور ترقی کے لئے ووٹ دینے کی اپیل کی۔
پرینکا گاندھی نے ٹوئٹ کیا، ’’یوپی کے میرے پیارے بھائیو – بہنو! ووٹ کرتے وقت ضرور یاد رکھیں کہ آپ کا ایک ووٹ ریاست کی ترقی میں، نوجوانوں کے لئے روزگار، کسانوں کی بھلائی، خواتین کی بااختیاری اور عوام کے مفاد میں پالیسیاں بنانے میں اہم کردار ادا کر سکتا ہے۔ آپ کا ووٹ سیاست میں تبدیلی لا سکتا ہے۔ ذمہ داری سے ووٹ کریں۔‘‘
وہیں کانگریس پارٹی کی جانب سے ٹوئٹ کیا گیا، ’’آج جب آپ ووٹ ڈالیں گے تو یہ نہ صرف آئندہ پانچ سالوں کے رخ کا ہی تعین نہیں کرے گا بلکہ ہمیشہ کے لئے ہوگا۔ آپ جب آج ووٹ ڈالیں گے تو ملحوظ خاطر رکھیں کہ آ اس حکومت کا انتخاب کر رہے ہیں جو آپ کے لئے کام کرے گی۔‘‘
کانگریس نے ووٹنگ کے پانچویں مرحلہ کی ووٹنگ کے دوران کسی بھی طرح کی بے ضابطگی کا تکنیکی خرابی کی رپورٹ کرنے کے لئے ہیلپ لائن نمبر جاری کئے ہیں۔ یوپی کانگریس نے ٹوئٹ کیا، ’’پانچویں مرحلہ کی ووٹنگ میں کسی بھی طرح کی بے ضابطگی، رخنہ اندازی، تکنیکی خرابی وغرہ پیش آنے پر مندرجہ ذیل نمبروں پر کانگریس پارٹی کو مطلع کریں۔‘‘ پارٹی کے اس ٹوئٹ میں 6 نمبر دئے گئے ہیں۔
خیال رہے کہ اتر پردیش میں پانچویں مرحلے کی 61 سیٹوں پر 693 امیدوار میدان میں ہیں، جن میں سے 90 خواتین ہیں۔ اس مرحلہ میں 12 اضلاع کے 2.25 ووٹر اپنے حق رائے دہی کا استعمال کر رہے ہیں، جن میں 1.20 کروڑ مرد، 1.05 کروڑ خواتین اور 1727 خراجہ سرا شامل ہیں۔ووٹنگ صبح 7 بجے شروع ہوئی جو شام 6 بجے تک چلے گی۔ پانچویں مرحلے میں سلطان پور، چترکوٹ، پرتاپ گڑھ، کوشامبی، پریاگ راج، بارابنکی، بہرائچ، شراوستی اور گونڈا میں پولنگ کا عمل جاری ہے۔
