نئی دہلی:کانگریس کے سابق صدر راہل گاندھی اور پارٹی کی اترپردیش کی انچارج جنرل سکریٹری پرینکا گاندھی واڈرا کے سروں کی ملکہ لتا منگیشکر کے انتقال پر گہرے رنج و غم کا اظہا ر کرتے ہوئے ان کے انتقال کو ملک کے لئے ناقابل تلافی نقصان قرار دیا ہے مسٹر گاندھی نے ٹوئٹ کرکے کہاکہ لتا منگیشکر جی کے انتقال کی افسوسناک خبر ملی۔ انکی آواز دہائیوں تک ہندستان کی مقبول آواز رہی ہے۔ ان کی سریلی آواز امر ہے اور ان کے دیوانوں کے دلوں میں بسی رہے گی اور دہائیوں تک انہیں مسحور کرتی رہے گی۔ میں دکھ کے اس لمحہ میں ان کے کنبہ کے اراکین، دوستوں اور ان کے مداحوں کے ساتھ تعزیت کا اظہار کرتا ہوں۔
محترمہ واڈرا نے کہاکہ ہندستانی موسیقی کے باغ میں سروں کو چن چن کر سجانے والی سروں کا پٹارہ محترمہ لتا منگیشکر جی کے انتقال کی افسوسناک خبر ملی۔ ان کے انتقال سے ہندستانی فن کی دنیا کو ناقابل تلافی نقصان ہوا ہے۔بھگوان لتا جی کو اپنے چرنوں میں جگہ دیں اور اس دکھ کے اس وقت میں اہل خانہ کو اس درد کو برداشت کرنے کی طاقت دے۔
اپنے تعزیتی پیغام کے ساتھ محترمہ واڈرا نے سابق وزیراعظم اندرا گاندھی کے ساتھ لتا منگیشکر کی نوجوانی کی ایک تصویر پوسٹ کی ہے جس میں وہ محترمہ گاندھی کے ساتھ بات چیت کررہی ہیں۔ مسٹر گاندھی نے بھی ان کی تصویر پوسٹ کی ہے جس میں ان کے یوم پیدائش اور انتقال کی تاریخ ہے۔
راہل۔پرینکا نے لتا منگیشکر کے انتقال پر صدمہ کا اظہار کیا
