10 اگست 2017 کو بی آر ڈی میڈیکل کالج میں ہوئے آکسیجن کمی معاملے کے وقت میڈیکل کالج کے محکمہ امراض اطفال کے ترجمان اور این ایچ ایم کے نوڈل انچارج رہے ڈاکٹر کفیل خان کو آج تمام الزامات سے بری کر دیا گیا ہے۔ سرکاری رپورٹ کے مطابق ہسپتال میں بچوں کی موت کے لئے وہ ذمہ دار نہیں ہیں اور انہوں نے ان بچوں کی جان بچانے کے لئے ہر ممکن کوشش کی تھی۔
واضح رہے کہ حکومت نے ان کے خلاف محکمہ جاتی جانچ کے احکام دئے تھے۔ انہیں دو سال پہلے بی آرڈی میڈیکل کالج میں آکسیجن کی کمی کی وجہ سے ہوئی 60 بچوں کی موت کے لئے بدعنوانی اور لاپروائی برتنے کا ملزم قرار دیا تھا اور ان الزامات کے تحت نہ صرف ان کو معطل کر دیا گیا تھا بلکہ ان کو کئی ماہ جیل میں بھی گزارنے پڑے تھے۔ اب سرکاری رپورٹ میں ان کو تمام الزامات سے بری کر دیا گیا ہے اور اس کی کاپی انہیں بھیج دی گئی ہے۔ واضح رہے کہ ڈاکٹر کفیل خان کی معطلی کو ابھی ختم نہیں کیا گیا۔ ڈاکٹر کفیل نے پورے معاملہ کی سی بی آئی سے جانچ کرانے کا مطالبہ کیا ہے۔
واضح رہے کہ اسٹامپ اور رجسٹریشن ڈپارٹمنٹ کے پرنسپل سکریٹری نے اس معاملہ میں اپنی جانچ رپورٹ 18 اپریل کو سونپ دی تھی۔ 15 صفحات پر مشتمل اس رپورٹ میں کہا گیا ہے کہ ڈاکٹر کفیل نے اپنی ڈیوٹی میں کوئی لاپروائی نہیں برتی تھی۔ رپورٹ میں مزید کہا گیا ہے کہ 10 اور 11 اگست کی درمیانی شب کو ہسپتال میں بچوں کی جان بچانے کے لئے انہوں نے ہر ممکن کوشش کی تھی۔
واضح رہے 10 اگست 2017 کو بی آر ڈی میڈیکل کالج میں آکسیجن کی کمی کی وجہ سے 60 بچوں کی موت ہو گئی تھی اور اس کے بعد میڈیا میں جب اس کو لے کر ہنگامہ ہوا تو جس ڈاکٹر نے بچوں کی جان بچانے کی ہر ممکن کوشش کی، اسی کو ان اموات کا ذمہ دار ٹھہرا دیا تھا۔ ڈاکٹر کفیل کو اس معاملہ میں جیل کی سزا بھی کاٹنی پڑی تھی۔
