ہریانہ کے وزیراعلیٰ منوہر لال کھٹر کی ایک ویڈیو سوشل میڈئیا پر وائرل ہو رہی ہے، جس میں وہ ہاتھ میں پھرسا لے کر کھڑے ہیں۔ پھرسا ہوا میں لہرا کر وہ کہتے ہیں کہ پھرسا دشمن کو تباہ کرنے کے لئے ہے۔ اس درمیان پیچھے سے ایک بی جے پی کے رہنما نے انہیں روائتی ٹوپی پہنانے کی کوشش کی جو وزیر اعلیٰ کو سخت ناگوار گزرا۔
دراصل ہریانہ میں آئندہ ہونےوالے اسمبلی انتخابات کے پیش نظر منوہر لال کھٹر انتخابی جلسوں اور ریلیوں سے خطاب کر رہے ہیں۔ بدھ کے روز بھی انہوں نے آشیرواد ریلی سے خطاب کیا۔ جیسے ہی بی جے پی کے رہنما نے ہریانہ کے وزیر اعلیٰ منوہر لال کھٹر کو ٹوپی پہنائی ان کا غصہ ساتویں آسمان پر پہنچ گیا اور انہوں نے اس رہنما کو گردن کاٹ دینے کی دھمکی دے ڈالی!
وائرل ویڈیو میں وزیر اعلیٰ کھٹر کہتے نظر آ رہے ہیں، ’’یہ کیا کر رہے ہو؟ گردن کاٹ دوں گا تیری۔ ہٹو ایک طرف۔ ‘‘ اس کے بعد بی جے پی رہنما کھٹر سے معافی مانگتے ہیں۔ اس ویڈیو کو کانگریس کے سینئر رہنما رندیپ سنگھ سرجے والا نے بھی شیئر کیا ہے۔
سرجے والا نے ٹوئٹر پر ویڈیو کو شیئر کرتے ہوئے طنز کرتے ہوئے کہا کہ غصہ اور غرور صحت کے لئے نقصان دہ ہے۔ کھٹر صاحب کو غصہ کیوں آتا ہے۔ پھرسا لے کر اپنے ہی رہنما کو کہتے ہی- ’گردان کاٹ دوں گا تیری۔ ‘ پھر عوام کے ساتھ کیا کروگے!
یہ پہلا موقع نہیں ہے جب وزیر اعلیٰ منوہر لال کھٹر نے اپنا آپا کھویا۔ اس سے پہلے کرنال میں کھٹر ایک تقریب میں عوام پر پھول برسا رہے تھے۔ اس دوران ان کے پاس کھڑے ایک نوجوان نے سیلفی لینے کی کوشش کی ۔ نوجوان کے فون اٹھاتے ہی کھٹر نے اس کو دھکا دیا اور پھٹکار لگائی۔ اس کے علاوہ فروری کے مہینے میں انہوں نے بزرگ جوڑے پر اپنا غصہ اتارا تھا۔ جوڑا 19 لاکھ روپے کے دھوکہ دہی کے معاملہ میں اپنی شکایت لے کر وزیر اعلیٰ کے ہاں پہنچا تھا۔
