واشنگٹن:امریکی محکمہ خارجہ نے ایف سولہ پروگرام میں جاری تعاون میں فنی سیکیورٹی ٹیم کے لئے پاکستان کو بارہ کروڑ پچاس لاکھ ڈالر مالیت کے فوجی آلات کی فروخت کی منظوری دے دی ہے۔
پاکستان کی حکومت نے امریکی حکومت سے تکنیکی اور نقل وحمل اور اس سے متعلقہ عوامل میں فنی تعاون جاری رکھنے کی درخواست کی ہے تاکہ ایف سولہ پروگرام میں بہتری کے ذریعے پاکستان کی امن مہم کو پایہ تکمیل تک پہنچانے کے لئے آپریشن میں مدد کی جاسکے۔
غیر ملکی خبر رساں ادارے کے مطابق امریکا نے پاکستان کے ایف 16 طیاروں کے لیے تکنیکی اور لاجسٹک سپورٹ کا اعلان کردیا۔ ایف 16 طیاروں کے لیے ساڑھے 12 کروڑ ڈالر کی سپورٹ فراہم کی جائے گی اور پاکستان کو ایف 16 طیاروں کے پرزے اور فنی خدمات فراہم کی جائیں گی۔
پاکستان کو ایف 16 طیاروں کی تکنیکی سپورٹ کا اعلان امریکا کی دفاعی سیکیورٹی تعاون ایجنسی نے کیا جب کہ تکنیکی و فنی سپورٹ کی منظوری امریکی محکمہ خارجہ نے دی۔
دوسری جانب امریکا نے بھارت کے سی 17 طیاروں کے لیے 67 کروڑ ڈالرز کی تکنیکی امداد کا بھی اعلان کیا ہے۔امریکہ کی جانب سے یہ اعلان وزیراعظم عمران خان کی صدر ڈونلڈ ٹرمپ سے ملاقات کے چند روز بعد کیا گیا ہے۔
امریکی محکمہ خارجہ کی جانب سے جاری بیان میں کہا گیا ہے کہ دونوں ممالک کے طیاروں کے لیے تکنیکی اور لاجسٹک سپورٹ کے فیصلے سے جنوبی ایشیا میں طاقت کا توازن نہیں بگڑے گا، جب کہ اس فیصلے سے امریکی خارجہ پالیسی اورقومی سلامتی کو بھی فائدہ ہوگا۔
